
第一世噶玛巴教言集1KM10རྗེ་དུས་གསུམ་མཁྱེན་པའི་མགུར་འབུམ་བཞུགས་སོ། །
1-2-139b
༄༅། །རྗེ་དུས་གསུམ་མཁྱེན་པའི་མགུར་འབུམ་བཞུགས་སོ། །
༄༅། །རྗེ་དུས་གསུམ་མཁྱེན་པའི་མགུར་འབུམ་བཞུགས་སོ། །ན་མོ་གུ་རུ། འོག་མིན་གནས་མཆོག་དམ་པ་ན། །ཆོས་དབྱིངས་དང་ཡེ་ཤེས་རོ་མཉམ་པ། །རྗེ་རྡོ་རྗེ་འཆང་ལ་གསོལ་བ་འདེབས། །ངེད་གསོལ་འདེབས་ཀྱི་བུ་ཚོ་ལ་བྱིན་གྱིས་རློབས། །ཤྲཱི་ནཱ་ག་རཱ་ཛའི་དགོན་པ་ན། །ཆོས་བཀའ་ཆེན་བཞི་ལ་མངའ་བརྙེས་པའི། །རྗེ་ཏེ་ལོ་པ་ལ་གསོལ་བ་འདེབས། ངེད་གསོལ་འདེབས་ཀྱི་བུ་ཚོ་ལ་བྱིན་གྱིས་རློབས། །བྱང་པུ་ལ་ཧ་རིའི་དགོན་པ་ན། །ཆོས་ཡི་གེའི་ཚོགས་ལ་མངའ་བརྙེས་པའི། །རྗེ་ནཱ་རོ་པ་ལ་གསོལ་བ་འདེབས། །ངེད་གསོལ་འདེབས་ཀྱི་བུ་ཚོ་ལ་བྱིན་གྱིས་རློབས། ལྷོ་ཤིང་ལོ་ཚལ་གྱི་དགོན་པ་ན། །ཆོས་རྒྱུད་སྡེ་ཡོངས ལ་མངའ་བརྙེས་པའི། །རྗེ་མར་པ་ལོ་ཙཱ་ལ་གསོལ་བ་འདེབས། ངེད་གསོལ་འདེབས་ཀྱི་བུ་ཚོ་ལ་བྱིན་གྱིས་རློབས། །གངས་ཁ་བ་ཅན་གྱི་དགོན་པ་ན། །ཆོས་བསྲེ་འཕོ་གཉིས་ལ་མངའ་རྙེས་པའི། །རྗེ་མི་ལའི་སྐུ་ལ་གསོལ་བ་འདེབས། །ངེད་གསོལ་འདེབས་ཀྱི་བུ་ཚོ་ལ་བྱིན་གྱིས་རློབས། །ཤར་དྭགས་ལྷ་དཔལ་གྱི་དགོན་པ་ན། །ཆོས་ཕྱག་རྒྱ་ཆེ་ལ་མངའ་བརྙེས་པའི། །རྗེ་དྭགས་པོ་ལྷ་རྗེ་ལ་གསོལ་བ་འདེབས༑ ༑ངེད་གསོལ་འདེབས་ཀྱི་བུ་ཚོ་ལ་བྱིན་གྱིས་རློབས། །ལྷ་ལུང་དཔལ་གྱི་དགོན་པ་ན། །ཆོས་གཅེར་མཐོང་ཉམས་དང་ལྡན་པ་ཡི། །རྗེ་སྒོམ་ཚུལ་གྱི་སྐུ་ལ་གསོལ་བ་འདེབས། །ངེད་གསོལ་འདེབས་
1-2-140a
༄༅། །ཀྱི་བུ་ཚོ་ལ་བྱིན་གྱིས་རློབས། །སྤྱི་གཙུག་པད་ཟླའི་གདན་སྟེངས་ན། །རང་སེམས་ཆོས་སྐུར་ངོ་སྤྲོད་པའི། །བླ་མ་རྣམས་ལ་གསོལ་བ་འདེབས། །ངེད་གསོལ་འདེབས་ཀྱི་བུ་ཚོ་ལ་བྱིན་གྱིས་རློབས༑ ༑ནུབ་ཕྱོགས་ཨཽ་རྒྱན་གཞལ་ཡས་སུ། །མཆོག་ཐུན་མོང་གཉིས་ལ་མངའ་བརྙེས་པའི། །ཡུམ་རྡོ་རྗེ་ཕག་མོ་ལ་གསོལ་བ་འདེབས། །ངེད་གསོལ་བ་འདེབས་ཀྱི་བུ་ཚོལ་ལ་བྱིན་གྱིས་རློབས། །གནས་དུར་ཁྲོད་ཆེན་པོའི་གཞལ་ཡས་ནས། །ཕྲིན་ལས་བཞི་ལ་མངའ་བརྙེས་པའི། །དཔལ་མ་མགོན་གཉིས་ལ་གསོལ་བ་འདེབས། །ངེད་གསོལ་འདེབས་ཀྱི་བུ་ཚོ་ལ་བྱིན་གྱི་རློབས། །བདག་གིས་ཁྱེད་ལ་གསོལ་བཏབ་པས། །བདག་དང་འགྲོ་དྲུག་སེམས་ཅན་རྣམས། །སྒྲིབ་པ་མ་ལུས་རབ་བསལ་ནས། །དཔལ་ཡོན་ཏན་ཁྱོད་དང་མཉམ་པར་ཤོག། །།རྗེ་བླ་མ་རྣམས་ལ་ཕྱག་འཚལ་ལོ། །སྐལ་ལྡན་ལམ་སྣ་དྲང་དུ་གསོལ༑ ༑འོག་མིན་ཆོས་ཀྱི་ཕོ་བྲང་ནས། །གསང་སྔགས་མ་ལུས་མཛོད་འཛིན་ཅིང་། །ཕྲིན་ལས་རྒྱུན་ཆད་མེད་པ་ཡི། །བཅོམ་ལྡན་རྡོ་རྗེ་འཆང་ལ་འདུད། །ཤར་ཕྱོགས་ཟ་ཧོར་གྲོང་ཁྱེར་ནས། །ཤྲཱི་ནཱ་ག་རཱ་ཛའི་དགོན་པ་རུ། །སྐུ་གསུམ་དབྱེར་མེད་དོན་རྟོགས་ནས། །སྤྲུལ་པ་བྱེ་བ་བརྒྱ་འགྱེད་པའི། །རྡོ་རྗེ་འཆང་གི་ཐུགས་ཀྱི་སྲས། །རྗེ་བཙུན་ཏེ་ལོ་པ་ལ་འདུད། །པུ་ལ་ཧ་རིའི་དགོན་པ་ན། །བསྐྱེད་རིམས་བཟླས་
1-2-140b
པའི་ནུས་པ་ཡིས། །མཁའ་འགྲོ་མ་ཡིས་ལུང་བསྟན་བྱུང་། །ཤར་ཕྱོགས་ལོགས་སུ་ཏེ་ལོ་བཙལ། །ཨཽ་རྒྱན་གཙུག་གི་ནོར་བུ་ལྟར། །སྤྲུལ་སྐུ་ཏེ་ལོ་དངོས་སུ་མཇལ། །བཅུ་གཉིས་བར་དུ་བླ་མ་བསྟེན། །དཀའ་བ་བཅུ་གཉིས་ཉམས་སུ་བླངས། །རྗེ་ཡི་བྱིན་རླབས་ཞུགས་པ་ཡིས། །བདེ་ཆེན་ལྷུན་གྲུབ་ཉམས་སུ་མྱོང་། །བརྟུལ་ཞུགས་མ་ལུས་རྫོགས་མཛད་པ། །དཔལ་ལྡན་ནཱ་རོའི་ཞབས་ལ་འདུད། །སྐྱེས་པ་མོན་བོད་མཚམས་སུ་སྐྱེས། །ལུས་དང་སྲོག་ལ་མ་བལྟས་པར། །དམ་ཆོས་རྒྱ་གར་ཡུལ་དུ་བཙལ། །གྲུབ་ཐོབ་བླ་མ་རྣམས་དང་མཇལ། །རྒྱུད་སྡེ་བཞི་ལ་མངའ་བརྙེས་པས། །དཔལ་ལྡན་ནཱ་རོའི་བྱིན་རླབས་ཞུགས། །ཆོས་རྣམས་སྒྱུ་མ་ཉིད་དུ་རྟོགས། །རྗེ་བཙུན་མར་པའི་ཞབས་ལ་འདུད། །སྐྱེས་པ་མང་གུང་མཚམས་སུ་སྐྱེས། །དམ་ཆོས་བལ་ཡུལ་དབུས་སུ་བཙལ། །ལྷོ་བྲག་གྲུབ་པའི་གནས་མདུན་དུ། །རྗེ་བཙུན་མར་པའི་ཞབས་ལ་གཏུགས། །ཆོས་ཟབ་མོ་མ་རྒྱུད་བསྐོར་གསུམ་གསན། །གདམས་ངག་ནཱ་རོའི་ཆོས་དྲུག་ཞུས། །བལ་བོད་གཉིས་ཀྱི་མཚམས་སུ་བྱོན། །བྲག་དམར་སྤོ་མཐོའི་དགོན་པ་རུ། །སྲོག་དང་རྩོལ་བ་ཉམས་སུ་བླངས། །དཔའ་བོ་མཁའ་འགྲོས་བྱིན་གྱིས་རླབས། །མཆོག་དང་ཐུན་མོང་དངོས་གྲུབ་བརྙེས། །སྤྲུལ་པ་རྣམ་པ་སྣ་ཚོགས་མཛད། །སྐལ་ལྡན་ལམ་སྣ་འདྲེན་མཛད་པའི། །རྗེ་བཙུན་མིད་ལའི་ཞབས་ལ་
1-2-141a
༄༅། །འདུད། །རྒྱལ་སྲིད་མཆིལ་མའི་ཐལ་བར་དོར། །རིགས་པའི་གནས་ལྔ་ཉིད་ལ་སྦྱངས། །འཁོར་ལོ་བདེ་མཆོག་ཉམས་སུ་བླངས། །བརྟུལ་ཞུགས་སྤྱོད་པའི་ཆོས་སྐུ་ཐོབ། །རྗེ་བཙུན་སྒྲོལ་མའི་ལུང་བསྟན་དང་། །བྱང་ཆུབ་འོད་ཀྱིས་གསོལ་བཏབ་མཛད། །བྱང་ཆུབ་སེམས་ཀྱི་སྤྱོད་པ་ཡིས། །རང་དོན་ཡལ་བར་དོར་ནས་ནི། །གཞན་དོན་ལྷུར་མཛད་བོད་དུ་བྱོན། །ཡེ་ཤེས་སྒྲོན་མེ་བཏེག་ནས་ནི། །མ་རིག་༩ མུན་པ་སེལ་མཛད་པའི། །གསེར་གླིང་པའི་ཐུགས་ཀྱི་སྲས། །དཔལ་ལྡན་ཨ་ཏིའི་ཞབས་ལ་འདུད། །ལོ་ཙཱ་ཁུ་རྔོག་འབྲོམ་གསུམ་དང་། །དགོན་པ་གོང་འོག་རྣམ་གཉིས་དང་། །སྐུ་མཆེད་གསུམ་པོ་ཡན་ཆད་ཀྱིས༑ ༑བསྟན་པ་དར་ཞིང་རྒྱས་མཛད་པའི། །བཤེས་གཉེན་གོང་མ་རྣམས་ལ་འདུད། །སྐྱེས་པ་གཞོའི་ནང་དུ་སྐྱེས། །ར་སྒྲེང་དཔལ་གྱི་དགོན་པ་རུ། །དི་པམ་ཀ་རའི་རྗེ་འཇུག་པའི། །སྐུ་མཆེད་གསུམ་གྱི་ཞབས་ལ་གཏུགས། །སྤྱན་སྔ་གཉིས་ཀྱི་ཐུགས་ཀྱི་སྲས། །བདེན་གཉིས་དབྱེར་མེད་དོན་རྟོགས་པས། །བསྡུ་དངོས་བཞི་ཡིས་གཞན་དོན་མཛད། །བཤེས་གཉེན་སྨྱུག་རུམ་པ་ལ་འདུད། །སྐྱེས་པ་གཉལ་གྱི་མཐིལ་དུ་སྐྱེས། །ཐ་སྙད་དེ་ཉིད་རིང་དུ་སྦྱངས། །གདམས་ངག་དབུ་རུ་སྟོང་དུ་བཙལ། །བཤེས་གཉེན་མང་པོའི་ཞབས་ལ་གཏུགས། །སྡེ་སྣོད་གསུམ་གྱི་དོན་བསྡུས་བསྟན། །སྐྱེས་བུ་རབ་འབྲིང་གཉིས་ལ་
1-2-141b
སྦྱངས༑ ༑འགྲོ་རྣམས་ཐུགས་རྗེས་སྨིན་མཛད་ཕྱིར། །བསླབ་པ་གསུམ་ལ་ནན་ཏན་མཛད། །དེས་ཀྱང་སྤྲོས་པ་མ་ཆོད་པས། །བྲིན་སྙེ་གཉིས་ཀྱི་མཚམས་སུ་བྱོན། །རྗེ་བཙུན་མིད་ལའི་ཞབས་ལ་གཏུགས། །ལུང་བསྟན་བྱིན་གྱིས་བརླབས་པ་མཛད། །སྲོག་རྩོལ་འཕོ་བ་ཉིད་ལ་སྦྱངས། །ས་ལམ་མཐར་ཕྱིན་སྐུ་གསུམ་ཐོབ། །ཐུགས་རྗེས་འགྲོ་བ་སྨིན་མཛད་པའི། །བླ་མ་སངས་རྒྱས་རྣམས་ལ་འདུད། །རྗེ་དུས་གསུམ་མཁྱེན་པས་གསུངས་སོ།། །། ཨོཾ་སྭ་སྟི། ལུས་ངག་ཡིད་གསུམ་དག་བྱེད་སྨན། །ཁམས་གསུམ་འཁོར་བའི་མུན་ནག་ནི། །གསལ་བར་བྱེད་པའི་སྒྲོན་མེ་མཆོག །མོས་གུས་དང་བས་ཕྱག་འཚལ་ལོ། །སངས་རྒྱས་གྲངས་མེད་འདས་པ་ནས། །གསལ་བར་རབ་ཏུ་གྱུར་པ་དེ། །གནས་གང་དུ་སྐྱེས་ཀྱང་ཆོས་ལ་དགའ། །གང་དང་འགྲོགས་ཀྱང་དབུལ་འཕོངས་སྐྱོང་། །སྙིང་རྗེ་རང་ཤུགས་ཉིད་ཀྱིས་སྐྱེ། །འགྲོ་ལ་ཕན་པ་ཉིད་དུ་འགྲུབ། །ནོར་བདུན་རྒྱན་གྱིས་རབ་ཏུ་མཛེས། །བྱམས་དང་སྙིང་རྗེའི་དཀྱིལ་འཁོར་གྱིས། །དགྲ་ཟུན་གཉིས་ཀྱི་བློ་གཏད་ས། །ངོས་དགའ་ཁ་བསགས་རྣམ་པར་སྤངས། །ཁ་གཏིང་མེད་པར་ཆོས་ལ་དགའ༑ ༑དེ་ཐེག་ཆེན་རིགས་ཀྱི་མཚན་ཉིད་ཡིན། །མི་རྟག་ཚེ་ལ་བློ་གཏད་མེད། །འཇའ་ཚོན་མཁའ་ལ་གསལ་བ་དེ། །སྐད་ཅིག་གིས་ནི་ཡལ་ནས་འགྲོ། །ཆུ་བོའི་རྒྱུན་དང་ཟིལ་པ་དག །ཡུད་ཙམ་གྱིས་ནི་
1-2-142a
༄༅། །འགྲིབ་པར་འགྱུར། །མདང་རྨི་ལམ་ཐུན་གཅིག་རྨིས་པ་དེ། །སད་པའི་དུས་ན་དྲན་པ་ཙམ། །འགྲོ་དྲུག་འཁྲུལ་པའི་སྣང་བ་འདི། །བདག་ཏུ་འཛིན་པ་ཞིག་པ་མེད། །རྩ་བ་ཆོད་ན་འཁྲུལ་པ་སྤངས༑ ༑སྟོང་ཉིད་སྙིང་རྗེའི་སྙིང་པོ་ཅན། །བསྒོམས་ན་རང་གཞན་གཉིས་ཀྱི་དོན། །འགྲུབ་འགྱུར་འདི་ལ་ཐེ་ཚོམ་མེད། །འཁོར་དང་མྱ་ངན་འདས་པའི་ཆོས། །རང་སེམས་ཀྱི་རྣམ་པར་འཁྲུལ་པ་སྟེ། །སེམས་མཁའ་ལྟར་གོ་ན་འཁྲུལ་པ་ཞི། །མཐའ་གཉིས་དང་བྲལ་བ་དབུ་མ་ཡིན། །སེམས་འཁོར་འདས་སུ་སྣང་བ་སེམས་ཙམ་སྟེ། །སྒྲོ་འདོགས་ཆོད་པས་ཚད་མའོ། །བདེ་བ་ངོས་བཟུང་མེད་པས་མ་རྒྱུད་ཡིན། གསལ་བ་འཛིན་པ་མེད་པས་ཕ་རྒྱུད་ཡིན། །དེར་ལྟ་བ་ཐམས་ཅད་རྫོགས་གྱུར་པས། །བཀའ་རྫོགས་པ་ཆེན་པོའི་གདམས་ངག་ཡིན། །རྟོགས་པ་དེ་འདྲ་ཞིག་སྐྱེས་གྱུར་ན། །ཁམས་གསུམ་འཁོར་བའི་སྡུག་བསྔལ་ཞི། །ཞི་བྱེད་ཞེས་ཀྱང་དེ་ལ་བྱ། །འཁོར་དང་མྱ་ངན་འདས་པ་དང་། །གཟུང་དང་འཛིན་པ་མ་ལུས་ཀུན། །བློ་འདས་སྤྲོས་དང་བྲལ་བ་མཆོག །སྟོང་པ་སྙིང་རྗེ་དབྱེར་མེད་པ། །རྟོགས་ན་དོ་ཧ་བསྐོར་གསུམ་ཡིན། །ཐབས་ལམ་གྱི་བྱེ་བྲག་ཅི་ཡོད་ཀྱང་། །འདི་སྐྱེ་བར་བྱེད་པའི་གདམས་ངག་ཡིན། །བཀའ་སྡེ་སྣོད་གསུམ་དང་རྒྱུད་སྡེ་བཞི། །འདི་གོ་བར་བྱེད་པའི་བཤད་པ་ཡིན། །གདམས་ངག་བཤད་པ་གང་
1-2-142b
གིས་ཀྱང་། །བླ་མ་རྣམས་ལ་མོས་གུས་བྱ། །འགྲོ་དྲུག་ཐུགས་རྗེས་བཟུང་བྱ་ཞིང་། །བསྐྱེད་པའི་རིམ་པ་ཝལ་གྱིས་བསྒོམ། །སེམས་ཀྱི་ངང་ལ་བཞག་པ་གཅེས། ཁྱེད་ཀྱིས་གདམས་ངག་བསྐུར་གསུང་པས། །རྡོ་རྗེ་ཚིག་གསུམ་གྱི་མན་ངག་འདི། །ཡི་གེར་བྲི་བ་མི་རིགས་ཀྱང་། །དད་ཤེས་ལྡན་པའི་སྐྱེས་བུ་ཁྱེད། །ཆོས་དང་འཐུན་པ་འབའ་ཞིག་པས། །རྗེ་བླ་མ་མཁའ་འགྲོས་བཟོད་པར་བཞེས། །རིན་པོ་ཆེ་ཁམས་པས༑ ༑ཡོན་བདག་ཤེས་རབ་མཁར་ལ་སྤྲིང་ཡིག་དུ་བསྐུར་བའོ།། །།ཨོཾ་སྭ་སྟི། སྤྲུལ་སྐུ་བླ་མ་བྱོན་པ་ཡིས། །འགྲོ་བ་གང་ཟག་ལས་ཅན་ཀུན། །དངོས་འཛིན་གདོན་ལས་སྒྲོལ་མཛད་པའི། །བླ་མ་རྣམས་ཀྱི་བཀྲ་ཤིས་ཤོག །ཤེས་རབ་རང་བཞིན་རྗེ་བཙུན་མ། །བརྩེ་བའི་རང་བཞིན་ཚུལ་གྱིས་ནི། །འགྲོ་བ་ཐར་པར་འདྲེན་མཛད་མ། །རྗེ་བཙུན་མ་ཡི་བཀྲ་ཤིས་ཤོག །འགྱིང་བག་ཕྱེད་དཀྲུངས་ཚུལ་གྱིས་ནི། །ཐབས་དང་ཤེས་རབ་ལྡན་པ་ཡི། །པདྨ་ཟླ་བའི་གདན་ལ་བཞུགས། །ཡིད་བཞིན་ལྷ་མོའི་བཀྲ་ཤིས་ཤོག །སྐུ་མདོག་སྔོ་ལྗང་བརྗིད་པའི་ཞལ། །རིན་ཆེན་རྒྱན་དང་དོ་ཤལ་མཛེས། །གཡས་གཡོན་འཇིགས་སྐྱོབ་ཨུཏྤལ་འཛིན། །ཡུམ་མཆོག་སྒྲོལ་མའི་བཀྲ་ཤིས་ཤོག །གུས་དང་བཅས་པས་བསྒོམ་བྱས་ན། །གསང་སྔགས་རབ་དུ་བརྗོད་པ་དེ། །ཕྲིན་ལས་རྣམ་བཞི་འགྲུབ་པ་དང་། །ཡི་དམ་ལྷ་ཡི་བཀྲ་ཤིས་ཤོག །
1-2-143a
༄༅། །མ་འོངས་དུས་སུ་མཇལ་བ་དང་། །རང་བཞིན་གཅིག་ཏུ་གྱུར་ནས་ཀྱང་། །འགྲོ་བ་འདྲེན་པའི་ཕྲིན་ལས་ལ། ཁྱད་པར་མེད་པའི་བཀྲ་ཤིས་ཤོག །བདེ་བར་གཤེགས་པས་བཀའ་བསྒོམས་ཤིང་། །གསང་བའི་བདག་པོའི་སྤྱན་སྔར་ནི། །བསྟན་པ་བསྲུང་བར་ཁས་བླངས་པ། །ཆོས་སྐྱོང་རྣམས་ཀྱི་བཀྲ་ཤིས་ཤོག །བླ་མ་ཡི་དམ་ཆོས་སྐྱོང་དང་། །སྐད་ཅིག་ཙམ་ཡང་མི་འབྲལ་ཞིང་། །ཐ་མལ་རྣམ་རྟོག་ལྡོག་པ་ཡི༑ ༑བཀྲ་ཤིས་དེས་ཀྱང་བདེ་ལེགས་ཤོག །རིན་པོ་ཆེ་དུས་གསུམ་མཁྱེན་པས་གསུངས་པའོ།། །།བླ་མ་རིན་པོ་ཆེ་འཕན་ཡུལ་བྱ་བཟང་དུ་དབྱར་དགུན་གསུམ་འདག་ཆར་བྱས་ནས་བསྒོམས། དེའི་དུས་སུ་མགུར་འདི་བཞེངས་པ་ཡིན་གསུང་། སྤྲང་པོའི་དྲན་པ་འདི་ལྟར་ཤར། །འཁོར་བ་རང་བཞིན་མེད་པར་ཤེས། །ཆོས་བརྒྱད་རྩིག་པའི་བློ་དང་བྲལ། །མྱ་ངན་འདས་པ་ལོགས་ན་མེད། །རྩོལ་བསྒྲུབ་བྱ་རྩལ་བློ་དང་བྲལ། །སངས་རྒྱས་རང་གི་སེམས་ལ་རྙེད། །གྲུབ་པ་ཐོབ་འདོད་བློ་དང་བྲལ། །རྟོག་པ་ཆོས་སྐུའི་རང་བཞིན་ལ། །བཟང་ངན་བྱེད་པའི་བློ་དང་བྲལ། །སྲིད་ཞི་གཉིས་མེད་དོན་གཅིག་རྟོགས། །ས་སྐབས་དབྱེ་བའི་བློ་དང་བྲལ། །ཕྱག་རྒྱ་བཞི་ལྡན་ཉམས་ཅིག་ཤར། །དགག་སྒྲུབ་གཉིས་ཀྱི་བློ་དང་བྲལ། །བདེན་གཉིས་དབྱེར་མེད་དོན་ཅིག་རྟོགས། །ལམ་ལྔ་བགྲོད་པའི་བློ་དང་བྲལ། །སེམས་ཉིད་ཆོས་ཀྱི་རང་ས་
1-2-143b
ཟིན༑ ༑ཚུགས་པ་བཟུང་བའི་བློ་དང་བྲལ། །གཅིག་ཤེས་ཀུན་གྲོལ་རྟོགས་པ་སྐྱེས། །ཐོས་པ་བྱེད་པའི་བློ་དང་བྲལ། །གཟུགས་དེ་སྒྱུ་མའི་ལུས་སུ་ཤེས། །གཅེས་པར་འཛིན་པའི་བློ་དང་བྲལ། །སྒྲ་གྲགས་སྟོང་དུ་འཛིན་པའི་གོ་བ་བྱུང་། །བཤེ་སྐུར་འཁྲུལ་པའི་གོ་བ་བྱུང་། །རང་སར་བཞག་པའི་ཆོས་ཉིད་གསལ། །ཐུན་མཚམས་འབྱེད་པའི་བློ་དང་བྲལ། །ང་ཡི་སེམས་ལ་དེ་ལྟར་གདའ། །བུ་ཡང་དེ་ལྟར་གོ་བར་མཛོད༑ ༑ཅེས་གསུངས་སོ།། །།རྗེ་བཙུན་རིན་པོ་ཆེ་བླ་མ་ལྷ་རྗེས། ཁྱོད་མོན་བོད་མཚམས་སུ་བསྒོམ་དུ་སོང་གསུངས་ནས་མོན་གྱི་རྒྱལ་པོའི་མཆོད་གནས་མཛད་ནས་མོན་གྱི་རི་ལ་བཞུགས་པའི་དུས་ན། གྲོགས་པོ་གཅིག་གིས་མགུར་གཅིག་གསུང་བར་ཞུ་ཟེར་བ་ལ། མགུར་འདི་བཞེངས་པ་ཡིན་སྐད། རྗེ་བླ་མ་རྣམས་པ་ཕྱག་འཚལ་ལོ། །དགོས་བཀའ་དྲིན་ཅན་ལ་སྐྱབས་སུ་མཆི། །ཕ་རིའི་རི་དེ་མོན་གྱི་རི། །ཚུ་རིའི་རི་དེ་བོད་ཀྱི་རི། །མོན་བོད་གཉིས་ཀྱི་ས་མཚམས་ན། །ཟད་པ་མེད་པའི་རྒྱལ་ཁམས་སུ། །དམིགས་པ་མེད་པའི་རྣལ་འབྱོར་འཁྱམས། །ངོ་སྲུང་མེད་པའི་རི་ཁྲོད་འགྲིམ། །སྔོན་ཆད་དབྱངས་ལ་སྐྱོར་མ་མྱོང་༑ ༑ཚུལ་ཁྲིམས་གསལ་གྱི་ཞལ་ངོ་རུ། །ད་རེས་དབྱངས་ལ་གསལ་ཅིག་འདེབས། །ཕ་རིའི་རི་དེ་མོན་གྱི་རི། །སྔོན་ཆད་འགྲོ་ཏ་མ་མྱོང་སྟེ། །མྱ་ངན་འདས་པའི་མཐའ་རུ་གོ །ཚུ་རིའི་རི་དེ་བོད་ཀྱི་རི། །
1-2-144a
༄༅། །སེམས་དྲན་རྟོག་སྣ་ཚོགས་རྒྱུ་ལགས་པས། ཁམས་གསུམ་འཁོར་བའི་མཐའ་རུ་གོ །མོན་བོད་གཉིས་ཀྱི་ས་མཚམས་ན། །ཟད་པ་མེད་པའི་རྒྱལ་ཁམས་དེ། །སངས་རྒྱས་ཀྱི་ཞིང་ཁམས་ཡིན་པར་གོ ༑དམིགས་པ་མེད་པའི་རྣལ་འབྱོར་འཁྱམས། །ངོ་སྲུང་མེད་པའི་རི་ཁྲོད་འགྲིམ། །ཆོས་བརྒྱད་ཟིལ་གྱིས་ནོན་པར་གོ །ཁྱེད་རི་ཁྲོད་འགྲིམ་པར་མ་ནུས་ན། །ནམ་མཁའ་བསྡུས་པས་མི་འདུས་ཀྱི། །སྐྱི་སེར བཟུང་བས་མི་ཟིན་གྱི། །སེམས་ཉིད་བལྟས་པས་མི་མཐོང་གི །ཚོགས་དྲུག་བཀག་པས་མི་ཁེགས་ཀྱི། །བསྒོམ་ན་ཤེས་པ་རང་ལུགས་ཞོག །འཐོར་ན་ཤེས་པ་རགས་ཡལ་ཐོང་། །འཁོར་འདས་ཞེན་མེད་ལྟ་བ་བདེ༑ ༑མི་རྟོག་འབྲལ་མེད་བསྒོམ་པ་བདེ། །འབད་མེད་ཤུགས་འབྱུང་སྤྱོད་པ་བདེ། །ཞེན་ཆགས་མཁའ་དག་འབྲས་བུ་བདེ། །དེ་ལྟའི་དོན་ཅིག་རྟོགས་ལགས་ན། །སྣ་ཚོགས་རོལ་མོ་མཚར་ཏེ་འཆི། །འཆི་བའི་འཇིགས་དང་བྲལ་ཏེ་འཆི། །འཁོར་བ་རང་གྲོལ་དུ་འགྲོ་སྟེ་འཆི། །དབྱངས་མཆོད་པར་བཞེས་ཅིག་གུ་རུ་རྗེ། །དོན་མཁས་བཙུན་རྣམས་ཀྱི་སྙན་དུ་གསོལ། །ཐུགས་དགྱེས་པར་མཛོད་ཅིག་གདན་གང་རྣམས༑ ༑ཞེས་གསུངས་སོ།། །།དེ་ནས་བླ་མ་ཅན་དུ་ཕྱིན་ཙམ་ན། ཡང་བླ་མས་ཁྱོད་ཤ་མེད་གངས་དཀར་ལ་བསྒོམ་དུ་སོང་གསུངས་ནས། དེར་བྱོན། དབྱར་ཟླ་བ་གསུམ་བཞུགས་པ་དང་། དེར་རྒྱགས་
1-2-144b
སྲབ་པ་དང་། རྒྱགས་ཚོལ་དུ་འགྲོ་བས་དགོན་པའི་འོག་ཏུ་ཕྱིན་ཙམ་ན། དེར་ཐུགས་དགོངས་བཏགས་པས། ག་རེ། ང་ལ་གདམས་པ་ཁྱད་པར་ཅན་ནི་ཡོད། བཅུད་ལེན་ཟད་པ་མེད་པ་ནི་ཤེས། བླ་མ་སངས་རྒྱས་ལྟ་བུ་དང་ནི་མཇལ། ཉམས་དང་རྟོགས་པ་ཁྱད་པར་ཅན་ནི་རྒྱུད་ལ་སྐྱེས་སྙམ་ནས། དེའི་དུས་སུ་མགུར་འདི་བཞེངས་པ། རྒྱུད་ལྡན་བླ་མ་རིན་པོ་ཆེ། །སྐལ་ལྡན་དགོས་འདོད་འབྱུང་བའི་གནས། །བྱིན་རླབས་ཕྱོགས་རིས་མེད་པར་འཆར། །དད་གུས་ཆུང་ན་ང་རང་ངན། །གསང་སྔགས་རྒྱལ་པོ་མ་བརྒྱུད་ནས། །གདམས་ངག་རྒྱལ་པོ་རྩ་རླུང་སྟོན། །ལུས་ལ་བདེ་དྲོད་འབར་ཙམ་ན། །བསྒོམ་སྲན་ཆུང་ན་ང་རང་ངན༑ ༑ཕ་དྲིན་ཆུང་ལ་རང་སྒོ་ཞན། །སྣལ་མ་སུམ་ཕྲུག་མི་བདོག་ཀྱང་། །གཏུམ་མོ་ལྷུན་གྲུབ་ཀྱི་གདམས་ངག་ཡོད། །འཁྱགས་ཀྱིས་དོགས་ན་ང་རང་ངན། །རང་ནོར་སྤྱད་དུ་མེད་པ་ལ། །དད་པ་ཅན་གྱི་མ་བཏེག་ཀྱང་། །བཅུད་ལེན་ཟད་པ་མེད་པ་ཤེས། །ལྟོགས་ཀྱི་དོགས་ན་ང་རང་ངན། །སྔར་འཁོར་བའི་སྡུག་བསྔལ་བཟོད་དཀའ་བས། །རིན་པོ་ཆེ་དང་མཇལ་དུས་སུ། །རྩེ་གཅིག་བསྒྲུབ་པ་བྱེད་པ་ལ། །སྙིང་རུས་ཆུང་ན་ང་རང་ངན། །བླ་མའི་བཀའ་བཞིན་བསྒྲུབ་ལགས་པས། །རྟོགས་པ་བརྟན་པོར་མ་གྱུར་ཀྱང་། །བར་དོ་རྣམས་གསུམ་གྱི་གདམས་ངག་ཡོད། །འཆི་བས་འཇིགས་ན་ང་རང་ངན། །ཞེས་གསུངས་
1-2-145a
༄༅། །སོ།། །།བླ་མ་རིན་པོ་ཆེ་མཚུར་ཕུ་ངོས་བཟང་དགོན་པ་ན་བཞུགས་པའི་དུས་ན་བདེ་བ་ལྔའི་མགུར་བཞེངས་པ། སྟོང་ཉིད་ཀྱི་ཀློང་ན་རིག་པ་འཕྱོ། །རྒྱུ་དུག་ལྔ་བྱ་བའི་མིང་ཡང་མེད། །ལྟ་བ་ཐག་ཆོད་བློ་རེ་བདེ། །གཉིས་མེད་ཀློང་ན་བདེ་ཆེན་འཕྱོ། །གོལ་ས་བྱ་བའི་མིང་ཡང་མེད། །བསྒོམ་པ་ཐག་ཆོད་བློ་རེ་བདེ། །སྐྱེ་མེད་ཀློང་ན་ཤུགས་འབྱུང་འཕྱོ། །དགག་སྒྲུབ་བྱ་བའི་མིང་ཡང་མེད། །སྤྱོད་པ་ཐག་ཆོད་བློ་རེ་བདེ། །ཡེ་ཤེས་ཀློང་ན་ཆོས་སྐུ་འཕྱོ། །ཚེ་འདི་དང་ཕྱི་མའི་མིང་ཡང་མེད། །འབྲས་བུ་ཐག་ཆོད་བློ་རེ་བདེ། །རྒྱལ་ཁམས་ཀྱི་ཀློང་ན་ཤུགས་འབྱུང་འཕྱོ། །ཉེ་དུ་འབྲེལ་པའི་མིང་ཡང་མེད། །རང་ཡུལ་ཐག་ཆོད་བློ་རེ་བདེ། །ཞེས་གསུངས་སོ། །རིན་པོ་ཆེ་གནས་ནང་ན་ལག་སོར་ཉ་ལ་མཆོད་པའི་དུས་སུ་འདི་གསུངས་པ་ལགས་སྐད། ཁར་རྩང་ལག་སོར་གསུམ་དུས་སུ། །རྗེ་ཡི་ཐུགས་དགོངས་རྫོགས་པའི་ཕྱིར། །གསུམ་ལ་མཆོད་པ་བྱེད་དུས་སུ། །སྲོད་ལ་རྗེ་ལ་གསོལ་བ་བཏབ། །ཐོ་རངས་གཉིད་ཀྱི་རྨང་ལམ་ན། །རྗེ་བཙུན་མདུན་དུ་བྱོན་པ་བསམ། །རྗེ་ཡི་ཞལ་ནས་འདི་སྐད་གསུང་། །རིག་པ་མཐའ་བྲལ་ལྟ་བར་གོ །གཉུག་མ་འགྱུར་མེད་བསྒོམ་པར་གོ །ཆགས་མེད་རྒྱུད་ཞི་སྤྱོད་པར་གོ །དེ་གསུམ་དབྱེར་མེད་འབྲས་བུར་གོ །དེ་རང་དོན་ཆོས་སྐུ་བྱ་བ་ཡིན། །ད་གཞན་དོན་ཕྲིན་ལས་འདི་ལྟར་མཛོད། །ཞེན་པ་
1-2-145b
མེད་པར་སྦྱིན་པ་ཐོང་། །གནོད་པ་མེད་པར་ཚུལ་ཁྲིམས་སྲུངས། །ཁྲོ་བ་མེད་པར་བཟོད་པ་སྒོམས། །སྙོམ་ལས་མེད་པར་བརྩོན་འགྲུས་རྩོམས། །ཡེངས་པ་མེད་པར་བསམ་གཏན་སྒོམས། །བདེ་ཆེན་སྤྲོས་བྲལ་ཤེས་རབ་སྐྱེད། །དེ་དྲུག་འགྲོ་བའི་དོན་དུ་བསྔོས། །གསུང་བ་གསན་སྐད། བླ་མ་རིན་པོ་ཆེ་གནས་ནང་ན་བཞུགས་པའི་དུས་སུ་གསུངས་པ། ན་མོ་གུ་རུ། འཁོར་འདས་གཉིས་སུ་མེད་པར་འདུག་རེ་དོགས་གཉིས་དང་བྲལ་ལམ་སེམས། །ཡིད་དམ་སེམས་ཀྱི་སྣང་བར་འདུག །བསྐྱེད་རིམ་བསྒོམ་པ་གཤོལ་ལམ་སེམས། །བར་ཆོད་དངོས་གྲུབ་ཡིན་པར་འདུག །བསྲུང་འཁོར་བཟླས་པ་གཤོལ་ལམ་སེམས། རླུང་སེམས་གཉིས་སུ་མེད་པར་འདུག །རྩ་རླུང་བསྒོམ་པ་གཤོལ་ལམ་སེམས། །སྐྱོན་ཉིད་ཡོན་ཏན་ཡིན་པར་འདུག །ཉམས་ཀྱི་གོལ་ས་ཆོད་དམ་སེམས། །སྣང་སེམས་གཅིག་ཏུ་འདྲེས་ནས་འདུག །གཟུང་འཛིན་གཉིས་དང་བྲལ་ལམ་སེམས། །བདག་གཞན་གཉིས་སུ་མེད་པར་འདུག །ཆགས་སྡང་གཉིས་དང་བྲལ་ལམ་སེམས། །ཡང་སྲིད་མེད་པའི་རྩེ་མོར་འདུག །ཚེ་གཅིག་གིས་ས་ལམ་ཆོད་དམ་སེམས། །ཡེ་ནས་ལྷུན་གྱིས་གྲུབ་པར་འདུག །རྒྱུ་རྐྱེན་གཉིས་དང་བྲལ་ལམ་སེམས། །ཡོད་མེད་གཉིས་ཀྱི་དབུ་མར་འདུག །བློ་ལས་འདས་པ་ཡིན་ནམ་སེམས། །མཉམ་བཞག་རྗེས་ཐོབ་འདྲེས་ནས་འདུག །སེམས་ལ་
1-2-146a
༄༅། །བརྟན་པ་ཐོབ་བམ་སེམས། །སྤྱོད་པ་ཚོགས་དྲུག་ལྷུག་པར་འདུག །མཚན་མ་རང་སར་གྲོལ་ལམ་སེམས། །དགེ་སྡིག་གཉིས་དང་བྲལ་ནས་འདུག །སྤྱོད་ལམ་རྣམ་བཞི་རང་ས་ཟིན། །སྙེམ་བྱེད་བྲལ་བ་ཡིན་ནོ་སེམས། །ཡུལ་ལྔ་སྒྱུ་མའི་ངང་དུ་འདུག །གློ་བུར་ཞེན་པ་ལོག་གམ་སེམས། །འོད་གསལ་རྒྱུན་ཆད་མེད་པར་འདུག །བར་དོ་རྣམ་གསུམ་མེད་དམ་སེམས། །ཐམས་ཅད་སེམས་སུ་ཆོད་ནས་འདུག ༑གཅིག་ཤེས་ཀུན་ལ་མཁས་སམ་སེམས། །ཚིག་གི་སྡེབས་སྦྱོར་བསམ་མ་དགོས། །ཆོས་ལ་བྱན་པོ་ཚུད་དམ་སེམས།། །།ཡང་བླ་མ་རིན་པོ་ཆེ་མཚོ་ལ་དཀར་པོ་ན་བཞུགས་པའི་དུས་སུ། ཨེ་མ་ཕུང་པོའི་དུར་ཁྲོད་ན། །སེམས་ཉིད་རང་བྱུང་རྒྱལ་པོ་བཞུགས། །དེ་སྔ་རྣམ་རྟོག་སེར་མས་བསྐྱོད། །ད་ལྟ་བདེ་ཆེན་གྱི་དོན་དང་ལྡན། །ནོར་བུ་རིག་པའི་བློན་པོ་དེ། །སྔ་པ་དྲན་པའི་ཀློང་དུ་སྟོར། །ད་ལྟ་བདག་གཞན་ཐམས་ཅད་རིག །འཁོར་དུ་གཏོགས་པའི་ཆོས་བརྒྱད་པོ། །སྔ་པ་རང་རང་གི་ཡུལ་དུ་གྱེས། །ད་ལྟ་འབྲལ་མེད་ཐང་ལ་འཚོགས། །ཀུན་གཞིའི་ཕྱི་མོ་སྟོང་ལྕམ་སྟེ། །སྔ་པ་འཆལ་པའི་སྐྱོན་གྱིས་གོས། །ད་ལྟ་སེམས་ཉིད་རང་ས་ཟིན། །སེམས་ཀྱི་རྟ་ཕོ་སྲབ་མེད་དེ། །སྔ་པ་ལོག་པའི་ལམ་དུ་རྒྱུག །ད་ལྟ་ཡང་དག་མཐུར་གྱིས་ཟིན། །སེམས་ཉིད་ནོར་བུ་རིན་ཆེན་དེ། །སྔ་པ་ཉོན་མོངས་གསེབ་ཏུ་སྟོར། །ད་ལྟ་རང་གི་
1-2-146b
ཞི་ལ་ཟིན། །གཞི་ལ་ལྟས་ཤིང་ཉམས་རེ་དགའ། །དོན་ལ་ལྟས་ཤིང་དགོད་རེ་བྲོ། །ཞེས་གསུངས་སོ། །རྗེ་བཙུན་རིན་པོ་ཆེ་པོམ་ཕུག་ན་བཞུགས་པའི་དུས་སུ། དགེ་བཤེས་བོད་ཀྱིས་ཞུས་པའི་དུས་སུ་བཞེངས་པ། རང་རིག་མཐའ་དང་བྲལ་བར་རྟོགས། །ལྟ་བའི་མཐར་ཐུག་ཡིན་པར་གོ །གྲུབ་མཐའ་མཁན་ལ་ཅི་ཆ་ཡོད། །གཉུག་མ་རྒྱུན་ཆད་མེད་པར་གནས། །བསྒོམ་པའི་མཐར་ཐུག་ཡིན་པར་གོ །རེས་འཇོག་མཁན་ལ་ཅི་ཆ་ཡོད། །ལུས་སེམས་འགྲོ་བའི་དོན་དུ་བསྔོ། །སྤྱོད་པའི་མཐར་ཐུག་ཡིན་པར་གོ །རང་དོན་མཁན་ལ་ཅི་ཆ་ཡོད། །དེ་གསུམ་དབྱེར་མེད་གཅིག་ཏུ་རྟོགས། །འབྲས་བུའི་མཐར་ཐུག་པར་གོ། །རེ་དོག་མཁན་ལ་ཅི་ཆ་ཡོད། །དོན་དེ་ལྟར་ལགས་སམ་བོད་སྒོམ་པ། །དེ་ལྟར་རྟོགས་ན་མཐར་ཐུག་ཡིན། །ལྟ་བསྒོམ་སྤྱོད་པ་འབྲས་བུ་བཞིའི་སྒོ་ནས་གསུངས་པའོ།། །།


目录
རྗེ་དུས་གསུམ་མཁྱེན་པའི་མགུར་འབུམ་བཞུགས་སོ། །